NATO-nun baş katibi Yens Stoltenberq Ukraynanın NATO-ya üzvlüyünü “uzaq ehtimal” kimi qiymətləndirib.
Busaat.az-ın xarici mediaya istinadən məlumatına görə, NATO-nun baş katibi Yens Stoltenberq bildirib ki, NATO üzvü olan ölkələr Ukraynanı alyansa qəbul etməkdən imtina etməyiblər, lakin bu məsələ hazırda gündəmdə deyil.
“NATO üzvləri əvvəllər razılaşıblar ki, Ukrayna bizim alyansımızın üzvü olmalıdır. Eyni zamanda, bu, uzaq bir ehtimaldır”, – Stoltenberq bildirib.
Stoltenberq deyib ki, hazırda NATO-nun Ukraynanı dəstəkləməsi və ona suveren və müstəqil dövlətini saxlamağa kömək etməsi vacibdir.
Finlandiya və İsveçin hazırda NATO-ya sürətli inteqrasiyasının əsas prioritet olduğu mesajını təkrarlayan Stoltenberq Finlandiya və İsveçlə bağlı “irəliləyişin” əldə edildiyini və Türkiyə, Finlandiya və İsveç rəsmilərinin gələn həftə Brüsseldə görüşəcəyini bildirib.
Stoltenberq əlavə edib: “Mesajım budur ki, həm Finlandiya, həm də İsveç iyul ayında Madriddə imzalanan üçtərəfli razılaşmada Türkiyənin tələblərini yerinə yetirdi. İndi həm Finlandiya, həm də İsveçi üzv olaraq qəbul edib təsdiq etməyin vaxtıdır”.
